Artíkulo 23: Enseñansa públiko i spesial

Artíkulo 23
  1. Enseñansa ta un asuntu ku ta risibí atenshon kontinuo di gobièrnu.
  2. Enseñansa ta liber. Esaki ta sin perhuisio di supervishon di parti di gobièrnu i, pa e tiponan di enseñansa indiká den lei, sin perhuisio di e investigashon di e kapasidat i moralidat di esnan ku ta duna enseñansa. Lo regla e aspektonan akí den lei.
  3. Ta regla enseñansa públiko den lei, respetando kada ken su religion òf filosofia di bida.
  4. Den tur munisipio i den tur e entidatnan públiko na kua ta referí den artíkulo 132a, gobièrnu ta ofresé sufisiente enseñansa públiko básiko di formashon general na un kantidat adekuá di skol públiko. Konforme e reglanan ku lo fiha den lei, por permití desviashon for di e disposishon akí, kon tal ku ta duna oportunidat pa risibí tal enseñansa, sea den un skol públiko òf no.
  5. Lei ta regla e eksigensianan enkuanto kalidat di enseñansa finansiá total- o parsialmente for di kaha di gobièrnu. Te asina leu ku ta trata di enseñansa partikular, esei ta sosodé tumando na kuenta e libertat di orientashon.
  6. Pa enseñansa básiko di formashon general, ta regla e eksigensianan akí di tal manera ku e kalidat di enseñansa partikular finansiá totalmente for di kaha di gobièrnu i esun di enseñansa públiko ta keda garantisá na un grado igualmente satisfaktorio. Ta regla esei respetando spesialmente e libertat ku enseñansa partikular tin pa skohe nan medionan di instrukshon i pa nombra dosente.
  7. Enseñansa partikular básiko di formashon general, ku ta kumpli ku e kondishonnan ku lo fiha den lei, ta risibí finansiamentu for di kaha di gobièrnu segun e mesun norma ku ta apliká den kaso di enseñansa públiko. Lei ta fiha e kondishonnan pa otorgá kontribushon for di kaha di gobièrnu na enseñansa partikular di formashon general sekundario i enseñansa superior preparatorio.
  8. Gobièrnu ta informá Staten General anualmente riba situashon di enseñansa.

Eksplikashon

Tene na kuenta: solamente e vershon na hulandes di Konstitushon tin balides. 

Gobierno tin e kuido pa enseñansa. Duna enseñansa ta libe, pero gobierno ta ehesé supervishon riba dje. Un i otro ta regla den lei, meskos ku e supervishon riba enseñansa i e formanan di enseñansa. Konforme esaki, e legislador mester tene kuenta ku religion òf konvikshon di bida di kada un.

Den òf for di kada munisipio mester tin oportunidat pa sigi enseñansa basiko públiko. Pa eksepshon esaki por tuma lugá tambe den un skol ku no ta públiko, por ehemplo na skolnan kaminda enseñansa particular i públiko ta kooperá ku otro.

Den e artíkulo akí tambe enseñansa particular ta garrantisá. Ta trata e ora ai di e libertat di direshon di e enseñansa particular i di e igualdat finansiero entre enseñansa públiko i enseñansa particular. E eksigensianan ku enseñansa públiko i particular mester kumpli ku n'e mester ta stipulá den lei.

Gobierno mester duna tur aña un informe na Staten-Generaal tokante e situashon di enseñansa.

Pa e diferente formanan di enseñansa a surgi un legislashon amplio, por ehemplo e Wet op het primair onderwijs, e Wet op het voortgezet onderwijs, e Wet op het hoger onderwijs en wetenschappelijk onderwijs, i e Wet studiefinanciering 2000. Ademas tin un lei ku ta regla e supervishon riba enseñansa.