Artikel : Disposishon general
Konstitushon ta garantisá e derechonan fundamental i e estado di derecho demokrátiko.
In andere talen:
Toelichting
Tene na kuenta: solamente e vershon na hulandes di Konstitushon tin balides.
Den un demokrasia e pueblo ta goberná, pero e pueblo no por tuma un desishon riba kada desishon di gobernashon òf lei. P'esei e mayoria di pais, inkluyendo Hulanda, tin un demokrasia representativo òf indirekto. Esei ta nifiká ku e pueblo ta skohe un kantidat di representante, kendenan na nòmber di e pueblo ta traha lei i ta tuma desishon tokante gobernashon di e pais.
Un estado di derecho ta un estado den kual libertat, seguridat hurídiko i igualdat hurídiko ta di importansia pa e siudadano. Ademas, e siudadano ta gosa di protekshon di su derechonan i libertatnan, kontra otro siudadanonan i kontra gobièrnu. Un siudadano ta sa e ora ei kiko ta su derechonan i debernan. Un estado di derecho demokratiko ta anto un pais den kual e estado di derecho a bin eksistí na un manera demokratiko.
E disposishon general akí, ku a wòrdu agregá na Konstitushon promé ku artíkulo 1 na 2022, ta determiná awor ku Konstitushon mester garantisá e estado di derecho demokratiko i ta salbaguardiá e derechonan fundamental. Esei ta nifiká ku e legislador konstitushonal mester examiná na kada kambio di Konstitushon si e estado di derecho demokratiko ta keda garantisá i si e derechonan fundamental ta keda salbaguardiá.