Kapítulo 4: Konseho di Estado, Kontrolaria General, Ombudsman Nashonal i kolegionan fiho di konsulta

1. Ta skucha opinion di Konseho di Estado, òf di un sekshon di Konseho, riba proposishon di lei i proyekto di medida general di gobernashon, i tambe riba proposishon pa Staten General aprobá tratado. Den e kasonan ku lo determiná den lei, por keda sin skucha tal opinion.
2. Konseho, òf un sekshon di Konseho, ta enkargá ku investigashon di e disputanan atministrativo ku ta resolvé mediante dekreto real, i ta proponé e sentensia.
3. Lei por enkargá Konseho, òf un sekshon di Konseho, pa dikta sentensia den disputa atministrativo.

1. Rei ta presidente di Konseho di Estado. E susesor probabel di Rei tin asiento den Konseho konforme derecho despues di a kumpli diesocho aña di edat. Den òf a base di lei, por otorgá asiento den Konseho na otro miembro di kas real.
2. Ta nombra e miembronan di Konseho pa bida largu mediante dekreto real.
3. Ta duna nan retiro riba petishon propio i ora nan kumpli un edat ku lo fiha den lei.
4. Konseho por suspendé nan òf duna nan retiro den e kasonan indiká den lei.
5. Por lo demas, lei ta regla nan posishon hurídiko.

1. Lei ta regla organisashon interno, komposishon i kompetensianan di Konseho di Estado.
2. Den lei, por enkargá Konseho, òf un sekshon di Konseho, ku otro tarea tambe.

Kontraloria General ta enkargá ku investigashon di e entrada- i gastunan di Estado.

1. Ta nombra e miembronan di Kontraloria General pa bida largu mediante dekreto real, for di un lista di tres persona ku Kámara di Representante di Staten General ta postulá.
2. Ta duna nan retiro riba petishon propio i ora nan kumpli un edat ku lo fiha den lei.
3. Korte Supremo por suspendé nan òf duna nan retiro den e kasonan indiká den lei.
4. Por lo demas, lei ta regla nan posishon hurídiko.

1. Lei ta regla organisashon interno, komposishon i e kompetensianan di Kontraloria General.
2. Den lei, por enkargá Kontraloria General ku otro tarea tambe.

1. Ombudsman nashonal ta investigá, riba petishon òf riba inisiativa propio, kondukta di e órganonan atministrativo di Estado i di e otro órganonan atministrativo designá den òf a base di lei.
2. Kámara di Representante di Staten General ta nombra Ombudsman nashonal i un Ombudsman suplente pa un periodo ku lo fiha den lei. Ta duna nan retiro riba petishon propio i ora nan kumpli un edat ku lo fiha den lei. Kámara di Representante di Staten General por suspendé nan òf duna nan retiro den e kasonan indiká den lei. Por lo demas, lei ta regla nan posishon hurídiko.
3. Lei ta regla e kompetensianan i funshonamentu di Ombudsman nashonal.
4. Den òf a base di lei, por enkargá Ombudsman nashonal ku otro tarea tambe.

1. Den òf a base di lei, ta instituí kolegio fiho di konsulta pa asuntu ku ta konserní legislashon i gobernashon di Estado.
2. Lei ta regla organisashon interno, komposishon i e kompetensianan di tal kolegionan.
3. Den òf a base di lei, por enkargá e kolegionan akí ku otro tarea tambe ku no ta di konsulta.

1. Ta publiká e konsehonan di e kolegionan na kua e kapítulo akí ta referí, segun regla ku lo fiha den lei.
2. Eksepto den e kasonan ku lo determiná den lei, ora emití un konseho riba un proposishon di lei entregá pa òf na nòmber di Rei, ta presentá esaki na Staten General.