Kapítulo 8: Revishon di Konstitushon
Kapítulo 8 ta regla e manera riba kua por modifiká Konstitushon. E stipulashonnan prinsipal ta ku esaki mester sosodé den dos paso i ku pa e di dos paso ta nesesario un mayoria kualifiká.
Promé, Tweede Kamer i Eerste Kamer mester aprobá un lei ku ta deklará ku lo tuma un modifikashon di Konstitushon den konsiderashon. Despues ta disolvé Tweede Kamer i ta tene elekshon.
Despues di esaki, Tweede Kamer i Eerste Kamer ta disidí tokante e modifikashon mes. Ta modifiká Konstitushon solamente si a aprobá e proposishon ku dos tersio di e votonan.
Finalmente, algun artíkulo ta trata e ratifikashon, promulgashon, entrada na vigor i publikashon di e Konstitushon modifiká, i e adaptashon di otro leinan na e modifikashon di Konstitushon.
Inhoud
137: Prome i di dos lektura; splitsmentu di proposishon; disolushon di Parlamento
- Lei ta anunsiá ku lo konsiderá un kambio den Konstitushon, proponé den tal lei.
- Kámara di Representante por dividí un proposishon pa tal lei, sea òf nò a base di un proposishon di òf na nòmber di Rei pa hasi esei.
- E Kámara di Representante ku keda elegí despues di publikashon di e lei na kua ta referí den insiso unu ta konsiderá e proposishon di kambio na kua ta referí den insiso unu, den su di dos vershon. Si tal Kámara di Representante no yega na un desishon riba e proposishon, esaki ta kaduká konforme derecho. Asina ku e kámara aprobá e proposishon, Senado ta konsider’é den su di dos vershon. Ámbos kámara por aprobá e proposishon di kambio solamente ku por lo ménos dos terser parti di e votonan emití.
- Kámara di Representante por dividí un proposishon di kambio ku por lo ménos dos terser parti di e votonan emití, sea òf nò a base di un proposishon di òf na nòmber di Rei pa esei.
138: Ajuste di stipulashonnan no kambia
- Promé ku Rei sanshoná e proposishonnan di kambio den Konstitushon ku keda aprobá den di dos vershon, den lei por:
- te asina leu ku ta nesesario, adaptá na otro e proposishonnan aprobá i e disposishonnan di Konstitushon ku no a kambia;
- modifiká e divishon i posishon di kapítulo, párafo i artíkulo, i tambe e enkabesamentunan.
- E kámaranan por aprobá un proposishon di lei ku ta kontené disposishon den sentido di insiso unu, sub a, solamente ku por lo ménos dos terser parti di e votonan emití.
139: Promulgashon; entrada na vigor
E kambionan den Konstitushon ku Staten General aprobá i Rei sanshoná ta drenta na vigor inmediatamente despues ku publiká nan.
140: Mantenshon di regulashon den konflekto
Lei i demas areglo i desishon eksistente ku ta na konflikto ku un kambio den Konstitushon ta keda na vigor te ora tuma un medida al respekto konforme Konstitushon.
141: Publikashon di teksto di Konstitushon revisá
Ta publiká teksto di e Konstitushon revisá mediante dekreto real; den tal publikashon, por renumerá kapítulo, párafo i artíkulo, i por kambia referensia korespondientemente.
142: Adaptashon di Konstitushon na Statüt di Reino Hulandes
Den lei, por harmonisá Konstitushon ku Statüt di Reino Hulandes. Artíkulo 139, 140 i 141 ta aplikabel analógikamente.