Kapítulo 6: Atministrashon di hustisia

1. Poder hudisial tin na su enkargo enhuisiamentu di disputa tokante derecho sivil i tokante reklamashon di debe.
2. Lei por enkargá enhuisiamentu di disputa ku no ta originá for di relashon hurídiko sivil sea na poder hudisial òf na tribunal ku no ta forma parti di poder hudisial. Lei ta regla e manera di trata esakinan i e efektonan di e desishonnan.

1. Ademas, poder hudisial tin na su enkargo enhuisiamentu di echo kastigabel.
2. Den lei, ta regla hurisdikshon disiplinario instituí pa gobièrnu.
3. Ta poder hudisial so por imponé kastigu di privashon di libertat.
4. Pa enhuisiamentu pafó di Hulanda i pa derecho penal di guera, lei por fiha regla diferente.

No por imponé kastigu di morto.

Pa loke ta e disputanan den sentido di artíkulo 112, insiso dos, por ofresé apelashon atministrativo komo rekurso.

1. Lei ta designá e tribunalnan ku ta forma parti di poder hudisial.
2. Lei ta regla organisashon interno, komposishon i e kompetensianan di poder hudisial.
3. Lei por stipulá ku persona ku no ta parti di poder hudisial tambe por partisipá den atministrashon di hustisia.
4. Lei ta regla e supervishon ku e miembronan di poder hudisial enkargá ku atministrashon di hustisia mester ehersé riba kumplimentu di kargo di tal miembronan i di e personanan na kende ta referí den e insiso anterior.

1. Mediante dekreto real ta nombra, pa bida largu, e miembronan di poder hudisial enkargá ku atministrashon di hustisia i e prokurador general di Korte Supremo.
2. Ta duna nan retiro riba petishon propio i ora nan kumpli un edat ku lo fiha den lei.
3. Den e kasonan determiná den lei, un tribunal designá den lei ku ta forma parti di poder hudisial por suspendé nan òf duna nan retiro.
4. Por lo demas, lei ta regla nan posishon hurídiko.

1. Ta nombra e miembronan di Korte Supremo di Reino Hulandes for di un lista di tres persona ku Kámara di Representante di Staten General ta postulá.
2. Den e kasonan i denter di e límitenan fihá den lei, Korte Supremo tin na su enkargo kasashon di sentensia hudisial pa violashon di lei.
3. Den lei, por enkargá Korte Supremo ku otro tarea tambe.

Ta enhuisiá miembro di Staten General, minister i sekretario di estado dilanti di Korte Supremo pa delito di kargo kometé den nan funshon, inkluso despues ku nan bandoná nan kargo. Ta duna e òrdu pa persekushon mediante dekreto real òf mediante un resolushon di Kámara di Representante.

Hues no ta husga konstitushonalidat di lei i tratado.

Eksepto den e kasonan fihá den lei, oudiensia hudisial ta públiko i e sentensianan ta kontené e fundamentonan riba kua nan ta basá. Ta pronunsiá sentensia públikamente.

1. Ta duna klemensia mediante dekreto real, despues di a risibí rekomendashon di un tribunal designá den lei i konforme e preseptonan ku lo fiha den òf a base di lei.
2. Ta duna amnistia den òf a base di lei.