Kapítulo 3: Staten-Generaal

E posishon ku parlamento ta okupá den e sistema estatal hulandes no ta wordu determiná solamente pa preskripshonnan konstitushonal, sino pa un parti importante tambe pa reglanan no skirbí. P’esei, e disposishonnan tokante Staten-Generaal inkluí den e kapítulo aki ta laga espasio pa e desaroyo di derecho no skirbí den nos sistema parlamentario.

E kapítulo tokante Staten-Generaal ta dividí den dos paragraf: Organisashon i komposishon, i Manera di traha. Mayoria di e disposishonnan ta apliká tantu na Tweede Kamer komo na Eerste Kamer. En kuanto na e komposishon di e Kambernan, e disposishonnan ta diferenshá.