Paragraf 1: Organisashon i komposishon

Staten General ta representá henter pueblo hulandes.

1. Staten General ta konsistí di Kámara di Representante i Senado.
2. Kámara di Representante ta konsistí di shentisinkuenta miembro.
3. Senado ta konsistí di setentisinku miembro.
4. Den seshon konhunto, ta konsiderá e kámaranan komo unu.

1. Periodo di seshon di ámbos kámara ta kuater aña.
2. Si den lei fiha un periodo di seshon pa konseho provinsial ku no ta kuater aña, ta modifiká e periodo di seshon di Senado korespondientemente.

1. Ta elegí e miembronan di ámbos kámara a base di representashon proporshonal, denter di e márgennan ku lo fiha den lei.
2. Ta tene elekshon mediante votashon sekreto.

1. E hulandesnan ku a kumpli diesocho aña di edat ta elegí e miembronan di Kámara di Representante direktamente, sin perhuisio di e eksepshonnan ku lo stipulá den lei relashoná ku hulandes ku no ta residente.
2. Un persona ku, debí ku el a kometé un delito ku konforme lei ta mará na tal konsekuensia, a risibí un sentensia irevokabel di hues pa un kastigu di privashon di libertat di un aña òf mas i tambe na privashon di su derecho di voto, ta ekskluí di su derecho di voto.

1. E miembronan di konseho provinsial i e miembronan di e kolegionan elektoral na kua ta referí den insiso dos i den artíkulo 132a, insiso tres, ta elegí e miembronan di Senado. Eksepto den kaso di disolushon di Senado, ta tene e elekshon denter di tres luna despues di elekshon di e miembronan di konseho provinsial.
2. Na benefisio di e hulandesnan ku no ta residente i ku ta kumpli ku e rekisitonan pa elekshon di Kámara di Representante di Staten General, ta tene elekshon pa un kolegio elektoral pa Senado. Tal hulandesnan ta elegí e miembronan di e kolegio elektoral ei direktamente. Pa membresia, e mesun rekisitonan ta konta. Artíkulo 129, insiso dos te ku seis, ta aplikabel analógikamente.

Pa por ta miembro di Staten General, un persona mester ta hulandes, e mester a kumpli diesocho aña di edat i e no por ta ekskluí di su derecho di voto.

1. Ningun persona por ta miembro di ámbos kámara.
2. Un miembro di Staten General no por ta a la bes minister, sekretario di estado, miembro di Konseho di Estado, miembro di Kontraloria General, Ombudsman nashonal ni Ombudsman suplente, ni miembro, prokurador general òf abogado general di Korte Supremo.
3. No opstante, un minister òf sekretario di estado ku a entregá su kargo por ehersé tal kargo i membresia di Staten General a la bes, te ora tuma un desishon tokante su entrega di kargo.
4. Pa otro funshon públiko, lei por stipulá ku no por ehersé nan pareu ku membresia di Staten General òf di un di e kámaranan.

Lei ta regla remplaso temporal di un miembro di Staten General pa motibu di embaraso i parto, i pa motibu di enfermedat.

Kada kámara ta eksaminá kredensial di su miembronan resien nombrá i ta disidí, konforme e reglanan ku lo fiha den lei, tokante e disputanan ku surgi relashoná ku e kredensialnan òf ku e elekshon mes.

Den lei, ta regla tur sobrá asuntu ku ta konserní derecho di voto i elekshon.

Na momento ku e miembronan di e kámaranan asumí nan kargo, nan ta hasi un huramentu òf deklarashon i promesa di integridat den e reunion, na e manera preskribí den lei, hurando òf primintiendo lealtat na Konstitushon i fieldat den kumplimentu di nan kargo.

1. Kada kámara ta nombra un presidente for di entre su miembronan.
2. Kada kámara ta nombra un sekretario. E sekretario i e demas ámtenarnan di e kámaranan no por ta a la bes miembro di Staten General.

Presidente di Senado ta dirigí seshon konhunto.

Den lei, ta regla provishon finansiero na benefisio di miembro i eks miembro di Staten General i di nan parientenan despues di nan fayesementu. E kámaranan por aprobá un proposishon di lei al respekto solamente ku por lo ménos dos terser parti di e votonan emití.

1. Por disolvé ámbos kámara mediante dekreto real.
2. E dekreto pa disolvé un kámara ta kontené a la bes òrdu pa tene un elekshon nobo pa e kámara ku a disolvé, i pa e kámara nobo ku keda elegí reuní denter di tres luna.
3. E disolushon ta drenta na vigor e dia ku e kámara nobo ku keda elegí reuní.
4. Lei ta fiha periodo di seshon di un Kámara di Representante ku sinta despues di un disolushon; e periodo no por ta di mas ku sinku aña. Periodo di seshon di un Senado ku sinta despues di un disolushon ta terminá na momento ku periodo di seshon di e kámara disolvé lo a terminá.