Paragraf 2: Manera di traha

Anualmente riba e di tres djamars di sèptèmber òf na un momento promé ku esei ku lo stipulá den lei, den un seshon konhunto di Staten General, ta duna un splikashon, pa òf na nòmber di Rei, di e maneho ku gobièrnu lo hiba.

1. Reunion di Staten General ta públiko.
2. Ta sera porta den kaso ku un désimo parti di e kantidat di miembro presente pidi esei òf si presidente konsiderá esei nesesario.
3. Despues, e kámara, respektivamente e kámaranan den seshon konhunto, ta disidí si lo deliberá i tuma desishon ku porta será.

1. E kámaranan, tantu separadamente komo den seshon konhunto, por deliberá i tuma desishon solamente si mas ku mitar di e miembronan ku tin asiento ta presente na e reunion.
2. Ta tuma desishon ku mayoria di voto.
3. E miembronan ta vota sin risibí instrukshon obligatorio.
4. Tokante asuntu, ta tene un votashon oral i nominal den kaso ku un di e miembronan pidi esei.

E ministernan i e sekretarionan di estado ta duna e kámaranan, tantu separadamente komo den seshon konhunto, verbalmente òf por eskrito, e informashon ku un òf mas miembro pidi, te asina leu ku dunamentu di tal informashon no ta kontra interes estatal.

1. E ministernan i e sekretarionan di estado tin akseso na e reunionnan i por partisipá na e deliberashonnan.
2. E kámaranan, tantu separadamente komo den seshon konhunto, por invitá nan pa presensiá un reunion.
3. Nan por laga otro persona, ku nan asigná pa esei, asistí nan na e reunionnan.

Tantu separadamente komo den seshon konhunto, tur dos kámara tin derecho di investigashon (enkuesta). Lo regla e derecho akí den lei.

No por entamá persekushon ni demanda hudisial kontra miembro di Staten General, minister, sekretario di estado ni e demas personanan ku partisipá na un deliberashon, pa loke nan bisa den reunion sea di Staten General òf di un komishon di Staten General, ni pa loke nan entregá por eskrito na esakinan.

E kámaranan, tantu separadamente komo den seshon konhunto, ta fiha un reglamento di órden.