Artíkulo 1: Tratamentu igwal i prohibishon di diskriminashon

Tene na kuenta: solamente e vershon na hulandes di Konstitushon tin balides. 

Artíkulo 1 ta trata di e prinsipio di igualdat. E prinsipio akí ta duna legislador, gobièrnu i xuesnan e enkargo pa, ora di fiha regla òf tuma desishon, trata hende den kasonan igual na un manera igual.

Sin embargo, no mester ta kestion di un kaso igual si tin un diferensia hustifiká. Asina por pone eksigensia na e nivel di enseñansa di hende pa por ehesé un sierto profeshon. Pero no mag di hasi distinshon a base di, por ehemplo, religion òf sekso. Asina hòmber i muhé mester gana mes tantu si nan ta hasi e mesun trabou òf trabou ku ta masha komparabel.

Diskriminashon a base di religion, konvikshon di bida, preferensia polítiko, rasa, sekso, desabilidat, orientashon seksual òf riba kualke otro motibu, ta prohibí. E palabranan òf riba kualke otro motibu ta ekstendé e prohibishon di diskriminashon na otro motibunan ku no ta menshoná den e artíkulo akí, pensa riba edat.

Den e lei Algemene wet gelijke behandeling e artíkulo akí ta mas elaborá. Den artíkulo 137 di Wetboek van Strafrecht tin disposishonnan ku kual por kastigá diskriminashon.