Artíkulo 52: Durashon di mandato di Eerste i Kámara di Representante

Tene na kuenta: solamente e vershon na hulandes di Konstitushon tin balides. 

Periodo di seshon di ámbos kámara ta kuater aña. E miembronan di e konsehonan provinsial, di e kolegionan elektoral di Hulanda Karibense i di e kolegio elektoral pa hulandesnan den eksterior ta elegí Senado (artíkulo 55). Su periodo di seshon ta ligá na esun di e konsehonan provinsial: si lei fiha un otro periodo pa nan, ta adaptá esun di Senado korespondientemente.

E durashon di periodo di sesion menshoná ariba ta konta pa Kámaranan ku ta wòrdu eligí despues di elekshon regular. Pa un Kámara di Representante ku a wòrdu eligí despues di un desolushon di Kámara, ta fiha e durashon di periodo di sesion den un lei. Esei ta pará den artíkulo 64 insiso 4. E durashon di periodo di sesion ta anto mas tantu sinku aña. Ku esei por hiba e elekshonnan regular atrobe na e momento deseá aki mas o menos kuater aña den mart òf mei, dependiendo si e aña ey tin tambe elekshon pa konseho munisipal i/òf pa konsehonan provinsial.

Pa un Senado ku a wòrdu eligí despues di desolushon di Kámara, e durashon di periodo di sesion ta keda meskos ku esun di e Senado desoltá, komo ku e durashon di periodo di sesion di Senado ta mará na esun di konsehonan provinsial.

E durashon di periodo di sesion di konsehonan provinsial ta kuater aña, ku eksepshon di e kasonan ku ta wòrdu determiná den lei (artíkulo 129, kuarto insiso). Si e legislador hasi uso di e posibilidat akí, e durashon di periodo di sesion di Senado ta wòrdu adaptá na e durashon mas largu òf mas kòrtiku di e periodo di sesion di konsehonan provinsial (artíkulo 52 insiso 2).

Si ta desviá di e durashon di periodo di sesion normal pa un òf algun provinsia so, por ehemplo serka un reestructurashon di provinsia, no lo ta nesesario sin embargo ningun prolongashon òf akortamentu di e durashon di periodo di sesion ni ningun elekshon interino di Senado.