Paragraf 1: Leinan i otro preskripshonnan

Gobièrnu i Staten General ta aprobá lei konhuntamente.

1. Entrega di proposishon di lei por tuma lugá pa òf na nòmber di Rei i dor di Kámara di Representante di Staten General.
2. Entrega di proposishon di lei ku ta rekerí tratamentu den seshon konhunto di Staten General por tuma lugá pa òf na nòmber di Rei i, te asina leu ku e artíkulonan korespondiente di kapítulo 2 ta permití esei, dor di e seshon konhunto.
3. Un òf mas miembro ta someté proposishon di lei na Kámara di Representante, respektivamente na e seshon konhunto, pa e kámara òf e seshon konhunto entregá esakinan.

Ta manda proposishon di lei entregá pa òf na nòmber di Rei pa Kámara di Representante òf, si tal proposishon ta rekerí tratamentu den seshon konhunto di Staten General, pa e seshon konhunto.

1. Miéntras Kámara di Representante, respektivamente e seshon konhunto, no aprobá un proposishon di lei entregá pa òf na nòmber di Rei, e kámara òf e seshon por modifik’é riba proposishon di un òf mas miembro i gobièrnu tambe por modifik’é.
2. Miéntras Kámara di Representante, respektivamente e seshon konhunto, no aprobá un proposishon di lei ku e mes a entregá, e kámara òf e seshon por modifiká esaki riba proposishon di un òf mas miembro, i e miembro òf miembronan ku a somet’é tambe por modifik’é.

Asina ku Kámara di Representante aprobá òf disidí di entregá un proposishon di lei, e ta mand’é pa Senado i esaki ta konsiderá e proposishon manera Kámara di Representante a mand’é. Kámara di Representante por enkargá un òf mas di su miembronan pa defendé den Senado un proposishon ku Kámara a entregá.

1. Miéntras Staten General no aprobá un proposishon di lei, esun ku a entreg’é por retir’é òf laga retir’é.
2. Miéntras Kámara di Representante, respektivamente e seshon konhunto, no aprobá un proposishon di lei ku e tin pa entregá, e miembro òf miembronan ku a someté tal proposishon por retir’é.

1. Un proposishon ta bira lei asina ku Staten General aprob’é i Rei sanshon’é.
2. Rei i Staten General ta notifiká otro enkuanto e desishonnan ku nan tuma riba kualke proposishon di lei.

Lei ta regla publikashon i entrada na vigor di lei. Un lei no ta drenta na vigor tanten ku no publik’é.

1. Ta adoptá medida general di gobernashon mediante dekreto real.
2. Den tal medidanan, ta fiha presepto mará na kastigu solamente a base di lei. Lei ta fiha e kastigunan ku por imponé.
3. Lei ta regla publikashon i entrada na vigor di medida general di gobernashon. Nan no ta drenta na vigor tanten ku no publiká nan.
4. Insiso dos i tres ta aplikabel analógikamente na otro presepto di karakter general i obligatorio adoptá di Estado.