Paragraf 2: Otro stipulashonnan

Gobièrnu ta promové desaroyo di órden hurídiko internashonal.

1. No ta mara Reino na tratado ni no ta retirá for di tratado sin aprobashon previo di Staten General. Lei ta determiná den ki kaso esaki no ta rekerí aprobashon.
2. Lei ta determiná e manera pa duna tal aprobashon i por inkluí aprobashon tásito.
3. Si un tratado ta kontené disposishon ku ta desviá for di Konstitushon òf ku ta hasi tal desviashon nesesario, e kámaranan por aprob’é solamente ku por lo ménos dos terser parti di e votonan emití.

Konforme, si nesesario, loke ta stipulá den artíkulo 91, insiso tres, mediante òf a base di tratado, por otorgá kompetensia legislativo, di gobernashon i di atministrashon di hustisia na organisashon di derecho internashonal públiko.

Disposishon di tratado i di resolushon di organisashon di derecho internashonal públiko ku, debí na nan kontenido, por ta obligatorio pa tur hende, ta haña forsa obligatorio despues ku publiká nan.

Presepto legal ku ta na vigor den Reino no ta aplikabel si nan aplikashon no ta kompatibel ku disposishon di tratado i di resolushon di organisashon di derecho internashonal públiko ku ta obligatorio pa tur hende.

Lei ta fiha regla tokante publikashon di tratado i resolushon di organisashon di derecho internashonal públiko.

1. No ta deklará ku Reino ta den guera sin konsentimentu previo di Staten General.
2. No ta rekerí tal konsentimentu den kaso ku, debí na un estado di guera ku ta eksistí di echo, tal konsulta ku Staten General a resultá imposibel.
3. Staten General ta deliberá i tuma desishon al respekto den seshon konhunto.
4. Loke ta stipulá den insiso unu i tres ta aplikabel analógikamente na un deklarashon di ku un guera a terminá.

1. Tin un forsa armá pa defensa i protekshon di e interesnan di Reino, i tambe pa mantenshon i promoshon di órden hurídiko internashonal.
2. Gobièrnu tin mando supremo riba forsa armá.

1. Forsa armá ta konsistí di persona ku ta sirbi boluntariamente i por konsistí ademas di persona ku ta kumpli ku servisio militar obligatorio.
2. Lei ta regla servisio militar obligatorio i e kompetensia pa posponé yamada pa servisio aktivo.

Lei ta regla eksenshon di servisio militar pa motibu di opheshon grave di konsenshi.

Konforme e reglanan ku lo fiha den lei, por imponé obligashon pa finnan di defensa sivil.

1. Gobièrnu ta duna Staten General informashon di antemano tokante utilisashon di forsa armá i ponementu di tal forsa na disposishon pa mantenshon i promoshon di órden hurídiko internashonal. Tokante utilisashon i ponementu di forsa armá na disposishon pa duna yudansa humanitario den kaso di konflikto armá tambe mester duna informashon di antemano.
2. Insiso unu no ta konta si debí na motibu di peso ta imposibel pa duna informashon di antemano. Den tal kaso, ta duna informashon mas pronto posibel.

1. Lei ta determiná den ki kaso por deklará, mediante dekreto real, un estado di eksepshon designá komo tal den lei, ku e meta di mantené siguridat eksterno òf interno; tal lei ta regla e efektonan di tal deklarashon.
2. Den tal sentido, por desviá for di e disposishonnan konstitushonal tokante kompetensia di e gobièrnunan di provinsia, e munisipionan, e entidatnan públiko den sentido di artíkulo 132a i e outoridatnan di maneho di awa, i for di e derechonan fundamental reglá den artíkulo 6, te asina leu ku esaki ta konserní ehersisio di e derecho deskribí den tal artíkulo pafó di edifisio i lugá privá, den artíkulo 7, 8, 9, 12, insiso dos i tres, i artíkulo 13, i tambe for di artíkulo 113, insiso unu i tres.
3. Inmediatamente despues ku deklará un estado di eksepshon i tanten ku no kansel’é mediante dekreto real, Staten General ta disidí, kada bes ku nan konsiderá esei nesesario, si e estado di eksepshon mester keda na vigor; nan ta deliberá i tuma desishon al respekto den seshon konhunto.

Ta imponé impuesto di Estado a base di un lei. Den lei, ta regla e demas imposishonnan di Estado.

1. Den lei, ta fiha presupuesto di entrada i gastu di Estado.
2. Anualmente, entrega di proposishon di lei general di presupuesto ta tuma lugá pa òf na nòmber di Rei, na e momento menshoná den artíkulo 65.
3. Ta duna Staten General kuenta i rason di e entrada- i gastunan di Estado konforme e disposishonnan di lei. Ta presentá na Staten General e kuenta aprobá pa Kontraloria General.
4. Lei ta fiha regla tokante atministrashon di finansa di Estado.

Lei ta regla sistema monetario.

1. Lei ta regla derecho sivil, derecho penal i derecho prosesal sivil i penal den kódigo general, sin perhuisio di e kompetensia pa regla sierto tema den lei individual.
2. Lei ta fiha regla general di derecho atministrativo.

Lei ta regla posishon hurídiko di ámtenar. Tambe, lei ta fiha regla tokante nan protekshon laboral i tokante derecho di partisipashon.

Gobièrnu ta praktiká transparensia den ehekushon di su tarea, konforme regla ku lo fiha den lei.

Den lei, ta instituí órden di kabayeria.